Пресс служба

16.10.2025 8:05:50

 Дар шаҳри Вашингтони Иёлоти Муттаҳидаи Америка, ҳамзамон, мулоқоти ҳайати Ҷумҳурии Тоҷикистон таҳти роҳбарии Муовини якуми Сарвазири Ҷумҳурии Тоҷикистон Холиқзода Ҳоким Ҳикматулло ва бо иштироки Вазири молияи Ҷумҳурии Тоҷикистон Қаҳҳорзода Файзиддин Саттор бо Президенти Гурӯҳи Бонки Исломии Рушд муҳтарам Муҳаммад Сулаймон Ал-Ҷассер баргузор гардид.

      Зимни мулоқот ҷонибҳо ҳамкории босамари байни Ҷумҳурии Тоҷикистон ва Гурӯҳи Бонки Исломии Рушдро, ки то имрӯз маблағгузории беш аз 900 миллион доллари амрикоиро дар бар мегирад, мусбат арзёбӣ намуданд. Ҷонибҳо саҳми арзандаи Бонки Исломии Рушдро дар пешбурди лоиҳаҳои стратегии кишвар, аз ҷумла ҷалби аввалин маблағгузории 150 миллион долларӣ ба Лоиҳаи нерӯгоҳи барқи обии Роғун ва саҳм дар ҷалби маблағҳои иловагии кишварҳои арабӣ қайд намуданд.

      Ҳамзамон дар рафти мулоқот афзалиятҳои стратегии кишвар муаррифӣ гардида, ҷиҳати идомаи дастгирии лоиҳаҳо дар самтҳои рушди энергетика ва афзоиши истеҳсоли нерӯи барқ аз манбаъҳои барқароршаванда, таҳкими инфрасохтори нақлиётӣ ва табдил додани Тоҷикистон ба кишвари транзитӣ, навсозии соҳаи обёрӣ ва таъмини оби нӯшокӣ, густариши иқтисоди сабз ва ҷорӣ намудани технологияҳои рақамӣ, дастгирии соҳибкории истеҳсолӣ ва рушди тиҷорат, инчунин вусъат додани иқтидори содиротӣ ва дастгирии бахши хусусӣ, даъват ба амал оварда шуд.

      Ҷонибҳо мувофиқа намуданд, ки ҳамкориро дар асоси Стратегияи ҳамкории дуҷониба барои солҳои 2023–2026 идома дода, барои таъмини устувории молиявии лоиҳаҳо, ҷалби бештари захираҳои имтиёзнок, аз ҷумла грантҳо ва қарзҳои бо шартҳои сабукро дар мадди аввал қарор медиҳанд.

     Дар фарҷом, ҷонибҳо омодагии худро барои таҳкими минбаъдаи ҳамкорӣ бо дарназардошти афзалиятҳои стратегии Тоҷикистон таъкид намуда, барои татбиқи лоиҳаҳои нав ва ҷалби маблағгузории иловагӣ мувофиқа ҳосил намуданд.